Murgsag-Maart

"As die somer die uitroeptekens van die jaar is, dan is Maart die rustige kommapunt."

Ek het Maart oor drie verskillende kontinente ervaar - in Suid-Afrika; Ierland en Amerika - en Maart bly my gunsteling maand.

Selfs die verskille tussen die twee noordelike wêrelde is nie genoeg om Maart van sy nommer-een posisie af te stoot nie.

Want Maart dra iets wat nie deur kaarte bepaal word nie, of deur weerkenners nie.

Daar is ‘n sagtheid. ‘n Moontlikheid.
‘n Belofte van good, better things to come.

Hoop.

Die gloed is nie altyd dieselfde nie.
Die kleur ook nie.
Nie eers die temperatuur teen jou vel bly konstant nie.

In die suide brand hy soms goud.
In die noorde huiwer hy nog met tye - bleek en bedagsaam.
Party plekke, soos Ierland, voel dit asof jy in ‘n wagkamer tussen seisoene sit,
warm baadjie styf om jou skouers,
net ingeval.

Daar is dae wat die son nog hard val.
Soos woorde wat skerp kan sny.
Soos mense wat mekaar met koue oë meet.

Maar die keuse bly altyd ons s’n.

Jy en ek kies:-

Om te kyk met sagte oë.
Om te vat met sagte hande.
Om te antwoord met sagte harte.

Sag beteken nie swak nie.
Sag beteken jy weet
jy hoef nie die wêreld se hardheid te weerspieël nie.

Dis wat Maart nog altyd vir my doen — hy herinner my dat murgsag
‘n keuse is - vir kyk, vir aanraak, en vir leef.

Mag jou Maart Magic murgsag wees - pure goud wat blink en skitter.

Wat is jou gunsteling Maart-herinnering?

Is dit die eerste reuk van die herfs, of daardie laaste warm dag by die see?"

Los vir my ‘n comment as Maart ook op jou ‘n sagte invloed het.